Неделя 3-я по Пятидесятнице, всех псковских святых

  Всенощное бдение праздника Собора Псковских святых в соединении с воскресной службой прошло в приделе преподобного Саввы Крыпецкого.

На богослужении присутствовали кроме братии, постоянных паломников обители и группа богомольцев из Рязанской земли.

Вечером по традиции исповедались желающие.

Звон большой колокольни, прозвучавший над окрестностями крыпецких болот, дал знать о начале Литургии.

К Святому Причастию приступило до 15 человек.

По окончании Божественной Литургии братия обители с паломниками молились у иконы всех Псковских святых.

В проповеди священник коснулся подвига псковских святых. За тысячелетнюю историю со дня Крещения Руси Псковская земля украсилась множеством монастырей и церквей. Великое число угодников Божьих всех званий и сословий пополнило лик святых. И по ныне их молитвы укрепляют, помогают нести подвиг служения Православной вере всем православным христианам. В особенности Небесное предстательство чувствуется рядом с местом подвигов псковских святых, на Псковской земле. 

Крыпецкие святые также входят в собор Псковских святых. Это и преподобные отцы Савва и Корнилий Крыпецкие чудотворцы.

От чрева матери избранные Богом преподобные отцы Савва и Корнилий несли свой подвиг подвижничества среди своих современников. Они преодолели самость, смогли направить все свои силы души и тела на служение Богу и ближним. И Господь их подвиг не оставил в забвении. 

Каждому христианину необходимо для спасения своей души укреплять Православную веру, совершать служение на своем поприще, искренне со смирением просить Божией помощи и не оставлять молитву дома, в храме Божием.

Чином Панагии закончилась праздничная воскресная служба.

Служба
Собора Псковских святых

В неделю 3-ю по Пятидесятнице

В СУББОТУ ВЕЧЕРА, НА МАЛЕЙ ВЕЧЕРНИ

На Господи, воззвах стихиры воскресны 4, глас 2.

Слава, святым, глас 1: Днесь страна Псковская /зри на велицей вечерни/. И ныне, Богородичен догматик гласа, малыя вечерни: О превелия таинства...

На стиховне стихира воскресна, и стихиры подобны святым, глас 2.

Подобен: Доме Евфрафов:

Стих: Веселитеся, праведнии, о Господе и исповедайте память Святыни Его.

Красуйся, земле Псковская. Граде Пскове, радуйся, во святых твоих торжествуй, яко от начала на тебе рука Господня: Пресвятыя Троицы дом бысть.

Стих: Помощь моя от Бога, спасающаго правыя сердцем.

Верою отеческую святися, Псковская страно, днесь и присно поминающи преподобныя твоя: в них же тебе заступление.

Стих: На Тя уповаша отцы наши, уповаша и избавил еси я.

Соборе святых Псковских, отрасль есте древа благочестия, еже на Руси насади Господь: поминайте убо нас и вы, предстояще у престола Божия.

Слава, святых, подобен:

Троице Единей припадающе, Господу за нас молящеся, велии нам есте заступницы, о святии земли Псковския: темже вас ублажаем, прехвальнии.

И ныне, Богородичен, глас той же:

О чудесе новаго...

По ныне отпущаеши и по Отче наш: тропарь воскресен.

Слава, тропарь святых, глас 4 /зри на велицей вечерни/.

И ныне, Богородичен, по гласу тропаря: Еже от века утаеное... Ектении. И отпуст.

НА ВЕЛИЦЕЙ ВЕЧЕРНИ.

На Господи, воззвах: поставим стихов 10. И поем стихиры воскресны 3, и восточну 1, и святым 6.

Стихиры святым Псковским, глас 4

Приидите, вси людие, восхвалим Собор святых земли Псковския, их бо предстательством есмы спасаеми, возопиим богоизбранным сице: радуйтеся, Церкви отеческия хранителие, радуйтеся Троическия Славы служителие, радуйтеся, яко есте присно зрящии Пресвятыя Троицы Свет Неприступный.

Божественныя Любве сладостию уязвишася, ни во что же вмениша земная, яко тленная, распаливше сердца огнем небесным, якоже светильницы Христовы возгорешася, озариша, святии, землю Псковскую: ими же и мы просвещаемии чудне, да обрящем вси о Господе душам нашим велию милость.

Российская похвало, Ольго богомудрая, державнии роди тобою призва к свету веры Господь, прозреша бо князие русстии, на Крест, водружен тобою, взирающе, и твоими зовоми молитвами, прелесть идольскую сокрушиша вовек. Темже и стране Псковстей дарова Бог заступники: о Всеволоде и Довмонте, князие благовернии, молите за нас Господа.

Ины стихиры святым 3, глас 6

Утверждаеми бысте Пречистою, во еже едино Христу послужити, страну же Псковскую честными обительми освятити, сотворилися есте, яко сосуды благодати, о преподобнии земли нашея предстателие: Иоасафе и Василие, страстотерпцы, Елиазаровы обители Евфросине и Серапионе, Псковоезерстии же Иларионе и Досифее, и Мальский Онуфрие, со Крыпецким Саввою и Никандром вкупе, молите Христа Бога, спастися душам нашим.

Щедре честнаго Успения слава осия чудный Твой, Пречистая образ, егоже благодатию во обители Псково-Печерстей воздвигла еси Богови преподобныя, якоже столпи благочестия нетленнаго, Духом бо святым просвещени суть вси просиявшии. Темже и восхвалим смирившая мира тлен: Марка, Иону, Вассу и преподобномученика Корнилия, с Господем бо пребывают днесь, молитвенницы о душах наших.

Яко истлив жало плотское и страстей приражения презрев, явил еси Пскову граду во юродстве красне лютых сих попрание крестом тяжким жития, о блаженне Николае, обличителю злочестивых, богогласне, днесь со всеми праведными земли нашея моли Христа Бога, во еже спастися и нам, грешным.

Слава, святых, глас 1. Подобен: Небо звездами:

Днесь страна Псковская светло сияет, святых свих память творящи, явися бо на Руси удел Троицы Живоначальныя, мы же, вси радующеся, вопием сице: Троице Святая, слава Тебе.

И ныне, Богородичен Догматик, глас 2: Прейде сень законная...

Вход и чтения три /преподобническия/.

На литии стихиры, глас 3

Воспоим Господеви песнь пресветлу, яко дарова нам просвещение душ наших, познаша бо вси людие русстии князи своими Креста силу: иже Владимиром славным во граде Киеве, прежде же Ольгою Богомудрою, яже Пскова града есть преславная дщерь: их днесь и молитвами Русь Святую Твою во благих спасай, Христе Боже.

Яко вои Христовы сотворилися есте, земли Отчия содеявшеся щит духовный, о благовернии князие Всевелоде и Довмонте, Пресвятыя Троицы содействующе силою, помогайте и нам сокрушати грехи наша.

Преподобных отец Псковских соборе дивный, благовестницы иныя жизни, яко бысте иноки: егда на земли ангельски пожили есте, небеса мирови явисте житием чудным, Того ради и ко Господу ныне взываете, да и нам отверзет двери горняя, яко милостив, спасаяй люди Своя.

Слава, святых, глас той же:

О заступницы святии земли нашея, не оставите сродник, вам молящихся, Христу бо есте чада избраннии, нам же отцы благочестнии, небесным - сорадователе, земным убо радование, добрии нам пастырие присно пребываете, яко Един есть всех пастырь, Христос Бог.

И ныне, Богородичен, воскресен стиховный, глас той же: Без семене от Божественного Духа...

На стиховне стихиры воскресны, глас 2.

Слава, святых, глас той же. Подобен: Доме Евфрафов: Троице Единей припадающе... /зри на малей вечерни/.

И ныне, Богородичен воскресен, глас той же: О чудесе новаго...

Тропарь, глас 4.

Егда призва к вере Господь страну Псковскую, узре богомудрая Ольга три лучи сияния чудна, идеже и создася Пресвятыя Троицы Дом Ея славен во Пскове граде, темже и вси святии в земли нашей явишася, подвиги бо мноземи благодатныя дары стяжавшии: того ради и днесь Светом Троическим озаряемии, о, вси святии Псковстии, молите Христа Бога спастися душам нашим.

НА УТРЕНИ

На Бог-Господь: тропарь воскресен, глас 2, дважды.

Слава: тропарь святых.

И ныне: Богородичен воскресен, по гласу тропаря святых: Еже от века утаеное...

На полиелее величание:

Величаем вас, святии вси, в земли Псковстей просиявшии, и чтим святую память вашу: вы бо молите за нас Христа, Бога нашего.

По ипакои гласа - седальны святых два.

Седален, глас 6.

Подобен: Тридневен воскресл еси:

Небесных селений насельницы, в них же всели вас Господь, соликовственницы ангелов, им же уподобистеся, отверзосте очи духовнии, яко херувимстии, исполнистеся слышания Вышняго, темже и земных явистеся заступницы, страны нашея Псковския молитвенницы.

Ин седален, глас 8.

Подобен: Что вас наречем, святии:

Что вас наречем, святии: горних ли жители, яко на небесех есте? Дольних ли хранители, яко стражи есте Отчия земли? Звезды ли мысленныя, яже дастеся нам в путевожди? Кормчия ли, яко души наша ведете ко Христу? Многими Богови угодили есте, темже и угодницы Божии именуеми: молите спастися душам нашим.

Слава, святых /полиелейный седален/, глас 8.

Подобен: О преславного чудесе:

О, земли нашея надеяние! Твоя, Троице Святая, молитвенники ублажаем днесь и ко престолу пренебесному припадаем, со их гласы вкупе вси Тебе взывающе: О Триедине Боже, любовию мир держай, воздаханий ради непрестанных нас не презри, но беззакония наша многая вся прости нам, яко Человеколюбец.

И ныне, Богородичен, глас 8.

Подобен: О преславного чудесе:

О, Преславная Владычице! Церкве Русския Покрове Небесный, от неяже лицы святых Тебе предстательствуют, их ради не остави чтущих Тя с любовию и Сыну Твоему за нас, грешных, молитвы приносящи, не престай спасати верныя, но и во уделе сем Руси Православныя источай милости Твоя богатыя, Ты бо благословенна еси во веки.

Степенна гласа. Прокимен и Евангелие воскресны.

КАНОН. Глас 2.

Припев: Вси святии земли Псковския, молите Бога о нас.

Песнь 1

Ирмос: Во глубине постла иногда фараонитское всевоинство преоруженная сила, Воплощшееся же Слово всезлобный грех потребило есть. Препрославленный Господь славно бо прославися.

Приидите, вси вернии, восхвалим Собор святых земли Псковския, воспоим днесь отцы преблаженныя, иже и ныне Пресвятей Троице непрестанно молящеся, яко велии заступницы, за нас грешных предстательствуют, преклоняюще к нам милосердие безмерное Спасово.

Приидите, христоименитии людие, почтим сродники своя преподобныя: тии бо духом на небесех ликовствующе, с нами вкупе ныне сорадуются, понеже страна наша Псковская и Псков, град пречестный, от начала богоизбранны явишася, яко Пресвятыя Троицы удел же содеяшася и яко Дом сотворишася Живоначальныя.

Приидите, вси празднующии, прославим молитвенник наших Собор духоносный, прежде же Ольгу, княгиню благоверную, ея бо крещением узре Русь во мраце идольстем Трисветлаго Света зарю восходящую, таже и попечением ея богомудрым страна сия Псковская, яже бысть ей Отечество, благодати нача исполнятися, Пресвятей Троице учитися поклонению.

Богородичен: Видехом Тобою, Владычице, миру Спасово явление, познахом бо верою истинною, яко вси идоли украшеннии суть гробы повапленнии. Того ради и мы, Сыном Твоим просвещаеми, днесь радуемся славне: погибе поганская тьма, возсия Свет Христов в земли Русстей, Свет, Неугасающий во веки.

Песнь 3

Ирмос: Процвела есть пустыня, яко крин, Господи, языческая неплодящая церковь пришествием Твоим, в ней же утвердися мое сердце.

Нифонте всехвальне, святый иерарше, егда освящаше Русь храмы пречудными, устроил еси и во Пскове граде обитель Мирожскую Спасову, в ней бо явися твоими молитвами благочестен светильник, Авраамий игумен: мы же его ублажаем согласне, яко ста нам начальный заступник, пред Господем ходатай изрядный.

Благоухает рака мощей твоих духоносная, Гаврииле-Всеволоде, княже наш благоверный, дал бо еси и ты Псковстей земли утверждение, во еже быти ей богоспасаемей присно - Пресвятей Троице воздвигл еси храм: темже и себе создав храм Духу Святому, обрел еси ко Господу дерзновение молити Его спасти души наша.

Восприим на раме Креста Господня оружие, благоверне княже Тимофее-Довмонте, славен быв, иже злых ратоборец, хранил еси Пресвятыя Троицы помощию Дом Ея и Землю честныя, нищия питая, люди вся милуя, яко и днесь Христа Бога молиши даровати нам мир и велию милость.

Богородичен: Освятила еси Псковскую страну, Пречистая, токами благодати Христовы всесильныя, яже святыми иконами Твоими от родов убо древних источала еси обильне: первее же образом Твоим духоносным во обители Мирожстей Спасовой, укрепляющи ратне князя Довмонта благоверного, такожде и многия, Тя просящия, исцеляющи душам во спасение.

Кондак, глас 4

Днесь Пресвятыя Троицы радуется град, и вся земля Псковская светло празднует, прославляющи, Господи, благочестный лик святых Твоих, ихже со крещения Ольгина даровал еси нам ко спасению, Отечеству же нашему к заступлению, яко и ходатаи пред Тобою суть непреложнии за вся праославныя, Русь Святую.

Икос

Утешителя дары в сердца восприемше, явилеся есте нам, отцы преблаженнии, подвиг бо многих сокровищи духовными сотворили есте пребогаты мощи своя, имиже и исцеления телесная, паче же душам нашим, живоносне источаете верным, якоже и прошения добрая предваряете любовию дивно, просвещаете ны очи сердечныя, во еже молитвами вашими, о святии заступницы Псковстии, и нам присно с Господем быти, уповающе с верою милости Его сподобистеся:: да и нас спасет, грешных, яко и вас спасл есть, лик убо пресветлый, истинно Русь же Святую.

Седален, глас 1

Подобен: Гроб Твой Спасе:

Царю и Господи, ныне сродницы наши Тебе предстоят, земнии бо небесными сташа: дал еси их нам, лик святый, лик всехвальный, во спасения спошпешники нам, явил еси славу их, Владыко Человеколюбче.

Слава, и ныне, Богородичен, глас той же:

Чудом преестественным из Тебе, о Богомати, Слово воплотися, тем убо и в естестве нашем, грехми окованнем, Божественная же Любовь жительствует свободне, во еже во веки нам душетленных сих ею свободитися.

Песнь 4

Ирмос: Пришел еси от Девы, не ходатай, ни ангел, но Сам, Господи воплощься, и спасл еси всего мя, человека, Тем зову Ти: слава силе Твоей Господи!

Бывши ти, Евфросиние, княгинею Псковскую, устроила еси ту обитель Предтечеву, в ней же и сотворилася еси Евпраксия преподобная: тем бо и миро иконою Спасовою у гроба твоего источашеся, темже и Марфа, подружия Довмонтова, в обители сей смиренне спасашеся. Того ради и ныне, вас, благовернии, поминающе, вопием с вами вкупе: слава силе Твоей Господи!

Иже от запад с набежья пришедшими бысте огнем сожигаеми, святии мученицы Мирожстии и Снетогорстии, игумене Василие, игумене Иоасафе и вся яже с ними: Пресвятую Троицу исповедали есте православне, того ради и муки сия претерпевше, днесь во Свете Трисияннем взываете сице, слава силе Твоей, Господи!

Священномучениче Исидоре и вси с ним страстотерпцы Юрьевстии, нетленными венцы увенчаны есте, яко, возлюбивше паче жизни веру Апостольскую, Церкве Соборныя не отверглися есте, воспевавше потопляеми: слава силе Твоей Господи!

Богородичен: Благословенна еси, Дево Чистая, и паки реку: Преблагословенная, человеком бо невозможная содея Тобою Господь, уготова Тя Сый Божественного вочеловечения таинству страшну. Мы же, Тобою, о Богомати, спасения чающе, Сотворившему вся сия вопием: слава силе Твоей, Господи!

Песнь 5

Ирмос: Ходатай Богу и человеком был еси, Христе Боже, Тобою бо Владыко, к Светоначальнику Отцу Твоему от нощи неведения приведение имамы.

Преподобне отче наш Марко, Псково-Печерский первонасельниче, приими пение сие верою тя почитающих, яко подвизался еси, Богови угождая, в пещере, Богом же зданней, просвещаем и во мраце ея убо Светом Трисветлым: темже и житие благочестне скончав, освящаеши ныне вся, ко гробу твоему притекающия.

Преподобне отче Ионо и мати преподобная Вассо, обители Печерския начальнии здателие! Жившим же вам во Юрьеве, граде Ливонстем, не пожелали есте латиняном поклонитися, но пришедше в страну Псковскую, устроили есте в горе Дом Пречистыя: того ради и днесь прославляеми, молите Ю, Владычицу, от бед нас избавити.

Монахом множества наставника тя почитаем, отче наш Евфросине, Елиазаровская похвало! Аще и устроив обитель свою, обаче смирения ради не учитель, ниже пресвитер саном не был еси, кротостию же и любовию, яко и блюдением уставов монашеских, ихже сам и состави премудре, явился еси Псковския земли всея авва, о ней же и молися, достоблаженне.

Богородичен: Святых икон Твоих помощию не оставила еси нас, Владычице, исполнила еси страну Псковскую благодатию их пребогатою, возрадовашеся убо весь же Чирская и весь Святогорская, возвеселися и обитель Печерская: явишася бо в них образы Твои чуднии, подающии чтущим Тя милости.

Песнь 6

Ирмос: В бездне греховней валяяся, неизледную милосердия Твоего призиваю бездну: от тли, Боже, мя возведи.

Укрепився Вседержителя благодатию, преподобне Серапионе, отче предивне, сотворился еси Евфросину всехвальну жесток спостник и в подвизех содруг, шищ и наг живяху вседневне, стал еси миру, якоже мертв, воздержанием, якоже ангел, Господеви едино труждаяся, Им же и прославлен еси, богоносе.

Ум к Богу вперив и благих бездну познавши сердцы, о преподобнии Иларионе и Досифее, понеже бысте от учение Евросиновых, иже вси освящаху землю Отеческую, освятили и вы брега езера Псковскаго честными своими обительми, от них же и к Горнему бо торжеству Жизнодавцем призвастеся.

Преподобне отче наш Савво, иноче всеблаженне, Премудрости Слова навык еси во афонских обителех, и во Псковскую землю пришед, проповедал еси благодати слова, бысть всем теплый заступник, скорбящим утешитель: темже и возсиял еси во обители своей, в веси Крыпецкой.

Богородичен: Явилася еси, Владычице, яко победное знамение Спасово, мирови бо знаменуеши плачевное бесов низложение: темже и ныне, Воевода Возбранная, воздвигни ты, грешныя, на страстей сокрушение, и, яко имущая державу непобедимую, от всяких нас бед свободи, Богородице Чистая.

Кондак и икос воскресны.

Песнь 7

Ирмос: Богопротивное веление беззаконнующаго мучителя высок пламень вознесло есть: Христос же простре богочестивым отроком росу духовную, Сый благословен и препрославлен.

Пение наше благодарное не презри, преподобне отче Мальский Онуфрие, но яко быв подражателем добродетели Евфросина преславна, и ныне, любви его нелицемерней последуя, моли о чтущих тя Господа, днесь бо еси служай ему со ангелы, благодать же нам зде подаеши обильне.

Рай соделал еси пустыню, преподобномучениче Корнилие: возлюбив Пречистыя обитель Печерскую, многими поты утвердил еси и украсил еси ю, якоже и ходившия окрест во тьме идольстей украсил еси Православием добре. Клеветою же приявшу ти страсти безвинно, водворился еси в чертозех Небесных, моляся не престая за обитель твою и вся люди, иже к раце мощей твоих притекают усердне.

Христа ради юродствуяй, блаженне Николае, Христовы правды рачителю, сотворился еси житием о Господе нуждным, якоже глас Божий мирови вопиющий: покайтеся неправеднии, покайтеся, нечестивии! Темже и душу свою за ближния полагая, сохранил еси ю, удобрив, для жительства присносущнаго.

Богородичен: Небес еси Ширшая, земных же Заступница, простри на ны сияния Твоего покров пресвятый, якоже и виде Дорофей, муж псковск благочестный, горе Тя со святыми нашими вкупе стоящу, град же Псков и всю землю русскую от бед сохраняющу чудно.

Песнь 8

Ирмос: Пещь иногда в Вавилоне действа разделяше. Божиим велением халдеи опаляющая, верныя же орошающая, поющия: благословите, вся дела Господня, Господа.

В пустыню вселився, преподобне отче Никандре, стяжал еси труды многими смирение, равноангельное: безропотен быв в болезнех тяжких, аще и обезножел еси сам в конец, духом же, аки на крилех чудных, воспарял еси Богови, иныя бо люди страждущия исцеляя вся благодатию.

Днесь пришедше песньми память твою венчати, Порховского края похвало, Иоакиме добре, ублажаем тя, яко был еси чтитель особь пророка Божия Илии славна, ему же и обитель, устроив ю, посвяти, с ним и ныне моли Христа Бога спастися душам нашим.

Проповедник бысть славы Богоматерния, Тимофее, блаженне праведниче, о явлении бо икон Святогорских Пречистыя возвестил еси радость мирови, ихже и чудеса вся велия вотще в Новеграде исповедую, ту и мученичества венец честный от несмысленных сердцем во узилище приял еси, Богородицу Деву прославляти же не престая.

Богородичен: Омы Господь грех наш Божественною Своею Кровию, Ты же, о Богомати, слезами Своими нас омываеши, понеже предстояла еси Кресту Владычню, того ради и Воскресшаго молиши ныне сице: Сыне Благий Мой и Господи, помилюй люди твоя, помилуй я.

Песнь 9

Ирмос: Безначальна Родителя Сын, Бог и Господь, воплощься от Девы, нам явися, омраченная просветити, собрати расточенная, тем Всепетую Богородицу величаем.

Киими похвалы ублажим вас, святии заступницы Псковстии, яко явленнии нам и неявленнии, яко на земли прославленнии и яко безвестнии, ангелом днесь в раи пребывающи равни, лицезреете яве Славу Господню: темже и Пресвятую Троицу присно молите за удел Ея сей и за вся Ея люди.

Киими словесы воспрославим вас красне, праведник наших Соборе пречудный, яко велии есте православных споборницы, иже даже до смерти возлюбивше отец святых веру, исполнили есте право заветы Христовы: того ради и сынове Божии наречени есте, того ради и нам испросите во веки спасение.

Слава, Троичен: О Пресвятая, Животворящая и Нераздельная Троице, Отче, Сыне и Душе Святый, всея твари Едине Содетелю, воспевает Тя, Боже, земля сия, припадающи присно к Дому Твоему, храму святому, идеже во блаженных вся Церковь Твоя, о нас, грешных, молящися, вопиет Ти сице: Троице Святая, слава Тебе!

И ныне, Богородичен: Якоже мати чадом своим сорадуется, радуйся, Пречистая, радостию нашею: радуйся, дивная Спаса Родительнице, яко в нем же прияхом Крещение, радуйся, Владычице, яко и страна наша Псковская Сыном Твоим Жизнодавцем во благая бо жительствует!

Светилен Воскресен /эксапостиларий 3-й/, глас 2: Яко Христос воскресе...

Слава, светилен святым, глас той же:

О вси святии земли Псковския, Пресвятыя Троицы ныне сияние зрящии, поминайте нас пред Господем, да и нам узрети Славу Божию, низлагающе верою всяк грех душ наших.

И ныне, Богородичен воскресен /эксапостилария 3-го/: Возсиявшее Солнце...

На Хвалитех: поставим стихов 8. И поем стихиры воскресны 4, и святым 4.

Стихиры святым Псковским, глас 4

Подобен: Свыше зван:

Святых Твоих память творяще, прославляем силу Твою, Господи, ею бо и в нас немощных спасение совершаеши, того ради и в земли нашей Псковстей явил еси отцы преблаженныя, и иже бяху перстнии, небеснии сотворишася: показаша яве мирови, яко благ Господь любящим Его, понеже и помиловани быша их ради боголюбия.

Цвете рая, Церкве украшение, святых Псковских Соборе чудне, Божественныя Любве прияли есте, преблаженнии, сокровище нерасхищаемое, имже и посмеялися есте приражением страстей, яже на вы восташша, яко татие и яко разбойницы тьмы душетленныя, ихже и сокрушили есте вся благодатию, вам подаваемою.

Ины стихиры святым, глас 8

Возлюбивше житие о Христе паче всех красных мира, обнищали есте духом буиим естества, Духа же Святаго благодати исполнилися есте, пренебесныя доброты источницы ставше, напоили есте Христовы правды жаждавшия. Темже и мы ныне к вам взываем: о вси святии наши Псковстии, молите за нас Господа еже и нам подаст воду живу жизни вечныя.

Яко дар честный страны Псковския, сокровенных благодати Божия похвало яве, благовернии князие и преподобнии и вси блаженнии, Пресвятыя Троицы уделе молитвенный, за отечество наше Российское предстояще Богови, ко Отечеству Вышнему путь нам крепко управите, да и мы убо Света Трисиянного не лишени будем, вас молящии.

Слава, стихира утренняя евангельская, глас 3: Магдалине Марии...

И ныне, Богородичен, глас 2: Преблагословенна еси, Богородице Дево...

Славословие великое. По трисвятом тропарь воскресен.

Ектинии и отпуст.

На 1-м часе тропарь воскресен. Слава, тропарь святых. И ныне, Богородичен часов.

По Отче наш: кондак святых. И совершенный отпуст.

НА ЛИТУРГИИ

Блаженна воскресна гласа, на 6, и от канона святых Псковских - песнь 9-я, на 4.

По входе тропарь воскресен и храма Богородицы /если есть/, и святых. Кондак воскресен. Слава, кондак святых. И ныне, храма Богородицы или Предстательство христиан непостыдное.

Прокимен воскресен гласа. Святых прокимен: Честна пред Господем смерть преподобных Его.

Апостол - ряд и святых: к Римляном, зачало 99. Аллилуия, глас 8: Веселитеся о Господе и радуйтеся, праведнии.

Евангелие - ряд и святых: от Матфея, зачало 38.

Причастен воскресен, и святых: Радуйтеся, праведнии, о Господе, правым подобает похвала.

МОЛИТВА

О предивная и преславная светила земли Псковския: святая равноапостольная великая княгине Ольго, первоугоднице Божия от всего рода Российского, князие псковстии благовернии, преподобнии и богоноснии отцы наши, пастырие и учителие, постницы и исповедницы, вси праведнии и преблаженнии! К вам прибегаем днесь и молимся вам с любовию: да будите небеснии заступницы Отечеству вашему и всей земли Русстей, наставляющии нас, сродники ваша, творити волю Господню, во еже преспевати и нам в вере, благочестии и любви христианстей, прославляющего Премилосердаго Творца, Господа и Спаса нашего, и Пречистую Его Матерь, яко Упование надеющихся и милостей Божиих подательницу! О вси святии наши псковстии, молимте, благосердии Христа Бога, да дарует и нам грешным, непорочное веры соблюдение, Церкви святыя от ересей и расколов ограждение, весей и градов наших благое утверждение, от нашествия иноплеменных сохранение, мира всего умирение, от глада и пагубы избавление, изобилие плодов земных, и вся, ко спасению и благочестному житию потребная, во еже бы и нам, чтущим святую память вашу, якоже и всем христианским родом, грядущим в земли сей, прославляти единым сердцем и едиными усты Святую, Единосущную, Животворящую и Нераздельную Троицу, Отца и Сына, и Святаго Духа, Ныне и присно, и во веки веков. Аминь.